Wat mécht eng Zentralbank?

Wann een d’Noriichten e bësse verfollegt, dann héiert een oft vun Zentralbanke wéi zum Beispill iwwert déi Europäesch Zentralbank oder déi amerikanesch „Fed“. Mee wat mëscht eng Zentralbank? An wéi eng Roll spillen sinn an der Geld- a Währungspolitik? Dat gitt dir dës Woch an eisem Artikel gewuer.

Generell ass eng Zentralbank d'”Bank vun de Banken” an awer och d’Bank vun engem Staat. Zentralbanke steieren zum Beispill, wéi vill Geld am Ëmlaf soll sinn. Dat ass an deem Sënn wichteg, well esou de Präisniveau stabil gehale ka ginn. Dëst ass ee vun den Haaptziler vun enger Zentralbank, well wann de Präisniveau klëmmt – och Inflatioun genannt – an d’Salairen net gläichzäiteg wuessen an d’Leit kënnen als Konsequenz vu Mount zu Mount manner kafen. Inflatioun gëtt normalerweis berechent iwwert d’Entwécklung vu Präisser vun enger bestëmmter Unzuel u Produkter. De genauen Niveau vun Inflatioun ze rechnen ass allerdéngs net einfach, well et ënnerschiddlech Definitioune gëtt wéi eng Produkter an dëser Rechnung solle berécksiichtegt ginn.

Als Rechebeispill kann ee Folgendes huelen: wann am Joer 2010 ee Bréitchen 1.00€ kascht an d’Inflatioun am Joer 2010 ass 2%, da kascht d’Bréitchen am Joer 2011 1.02€. Wann dëst mat ville Präisser gläichzäiteg geschitt, da verléieren d’Leit u “Kafkraaft”.

Fir dat eng Zentralbank an de Geldfloss kann agräifen, muss si d’Wirtschaft also ëmmer am Aa behalen an analyséieren. Wann zum Beispill méi produzéiert gëtt, da muss och d’Zomme vun de Suen erop goen. Ee Problem entsteet nämlech, wann sech d’Relatioun tëschent der Produktioun an der Zomme vu Suenverännert. Wann et zu Inflatioun kënnt, da kann eng Zentralbank normalerweis och méi Suen an den Ëmlaf bréngen. Si mécht dat, well esou d’Leit erëm méi Kafkraaft hunn, wat d’Nofro un de Produkter erhéije soll, an esou d’Entreprisen un hire Kapassitéite kënne produzéieren.  Wann d’Ekonomie erëm gutt leeft, gëtt erëm Geld aus dem System geholl fir dat ët net zur ëmgedréinter Situatioun kënnt, mee och net ze vill, fir den Opschwong vun der Wirtschaft ze hënneren.

Eng Zentralbank kann als Instrument fir d’Geldpolitik ze steieren och de sougenannte Leetzëns reegelen. Dat beaflosst den Zënssaz am allgemengen an och d’Wirtschaft. D’Banke kënnen sech da fir ee bestëmmten Zënssaz Sue léinen bei der Zentralbank. Dat beaflosst dann zu wat fir engem Taux d’Banke kënnen u privat Leit weider léinen. Am Moment ass de Leetzëns ganz déif, bei 0,0% an der Eurozon, fir d’Wirtschaft unzekuerbelen. Esou kënnen Entreprisen, privat Leit an och Banke „bëllegt“ Geld kréien an investéieren, wat dobäi hëllefe soll, dass méi produzéiert gëtt wat d’Ekonomie zum Wuessen an d’Aarbechtslosegkeet zum Fale brénge soll. Ëmgedréint kann d’Zentralbank och den Zënssaz erhéije fir d’Nofro vum Geld ze verréngeren an esou de Konsum ze bremsen, iert et zu enger “Blos” kënnt an där de Präis vun engem Produkt (z.B. Haiser) iwwert hirem tatsächleche Präis läit.

Déi Europäesch Zentralbank zu Frankfurt huet als Aufgaben, d’Geldpolitik an der Euro-Zone ze reegelen an den EU-Memberstaaten hir Reserven ze verwalten. Zudeem mëscht si och Statistike fir hir Aarbecht besser maachen ze kënnen an d’Situatioun vun der Euro-Zone ze analyséieren. Doriwwer eraus huet d’EZB och eng Roll am Devisëmaart an an der Iwwerwaachung vu systemrelevante Banken an Europa.

Artiklen fir weider ze liesen:
Däitsch:

– Pro a Contra fir déi aktuell Zënspolitik vun der Europäescher Zentralbank

http://www.zeit.de/2016/51/europaeische-zentralbank-mario-draghi-zinsen

– Een Artikel iwwert Geschicht vun den Zentralbanken

http://www.faz.net/aktuell/wirtschaft/wirtschaftswissen/wirtschaftswissen-kleine-geschichte-der-zentralbank-1606276.html
Franséisch:

– En Artikel iwwert d’Aufgaben vun der franséischer Zentralbank

http://www.slate.fr/story/107195/a-quoi-sert-banque-de-france

– Wat bedéiten 0,0% Leetzëns vun der Eurozon?

http://www.lemonde.fr/les-decodeurs/article/2016/03/10/c-est-quoi-les-taux-directeurs-de-la-bce_4880844_4355770.html
Englesch:

– En Artikel zur Relatioun tëschent dem “Pound Sterling” an dem Euro

http://www.telegraph.co.uk/business/2017/08/30/pound-heading-parity-euro/

– Eng Kritik zur britescher Zentralbank.

https://www.bloomberg.com/view/articles/2017-08-17/bank-of-england-s-caution-is-justified-what-happens-when-it-isn-t

Source vun de Biller:

Bild1: http://biografieonline.it/img/bio/Mario_Draghi_1.jpg

Bookmark the permalink.

Leave a Reply

Your email address will not be published. Required fields are marked *